وزیراعظم کی ترک صدرسے ملاقات،زلزلے میں ہزاروں انسانی جانوں کے ضیاع پراظہارِافسوس
پاکستان
وزیراعظم پاکستان شہبازشریف نے انقرہ میں ترک صدر رجب طیب ایردوآن سے ملاقات کی ہے اور ان سے ترکیہ میں حالیہ تباہ کن زلزلے کے نتیجے میں ہزاروں قیمتی جانوں کے ضیاع اوربنیادی ڈھانچے کو پہنچنے والے نقصان پر اپنی حکومت اور پاکستانی عوام کی جانب سے دلی تعزیت کا اظہارکیا ہے۔
وزیراعظم نے ان سےگفتگو میں دونوں ممالک کے درمیان برادرانہ تعلقات کا ذکر کرتے ہوئے کہا کہ پاکستانی عوام نے اپنے ترک بھائیوں اور بہنوں کے درد اور کرب کومحسوس کیا ہے۔پاکستانی عوام اس وقت تک آرام سے نہیں بیٹھیں گے جب تک زلزلہ سے متاثرہ علاقوں میں آخری شخص کی مکمل بحالی نہیں ہو جاتی۔
صدر ایردوان نے تباہ کن زلزلے کے تناظر میں ترکیہ کے لیے پاکستان کی مدد اور حمایت پر وزیراعظم کا شکریہ ادا کیا۔انھوں نے اس بات کا اعادہ کیا کہ ترکیہ کی قوم اس قدرتی آفت کے نتیجے میں ہونے والی تباہی سے مزید مضبوط اور پُرعزم ہوکراُبھرے گی۔
وزیر اعظم ترکیہ میں حالیہ شدید زلزلے کے بعد پاکستان کی جانب سے یک جہتی اورحمایت کے اظہار کے لیے برادرملک کا دورہ کررہے ہیں۔وہ زلزلے سے متاثرہ علاقوں میں بھی جائیں گے اور وہاں امدادی سرگرمیوں میں شریک پاکستان کی ریسکیواورریکوری ٹیموں سے ملاقات کریں گے۔
میاں شہبازشریف کے ہمراہ وفاقی وزیراطلاعات و نشریات مریم اورنگزیب، وزیراعظم کے معاون خصوصی طارق فاطمی اور چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدرملک بھی ترکیہ کے دورے پرگئے ہیں۔