سعودی عرب اور ترکیہ نے غزہ سے اسرائیلی انخلا
اور یمن و سوڈان کی وحدت پر زور دیا
سعودی عرب اور ترکیہ کے رہنماؤں کے درمیان ریاض میں ہونے والی
ملاقات کے بعد جاری مشترکہ بیان میں غزہ میں فوری نسل کشی بند کرنے، غزہ کی پٹی سے
اسرائیلی قبضے کے خاتمے اور فلسطینی عوام کے حقوق کے تحفظ پر زور دیا گیا۔
بیان میں دونوں ممالک نے علاقائی اور بین الاقوامی سطح پر امن و
سلامتی کے لیے تعاون جاری رکھنے کے عزم کا اعادہ کیا اور خطے میں بڑھتے ہوئے
تنازعات اور عدم استحکام پر گہری تشویش کا اظہار کیا۔
مشترکہ بیان میں یمن کی خود مختاری، وحدت اور علاقائی سالمیت کی
حمایت کی گئی اور یمن کو تقسیم کرنے کی کسی بھی کوشش کی مخالفت کی گئی، جبکہ سوڈان
کے حوالے سے بھی ملک کی وحدت، سلامتی اور قانونی اداروں کے تحفظ پر زور دیا گیا۔
فریقین نے اس بات پر اتفاق کیا کہ علاقائی استحکام، امن اور خوش
حالی کے لیے مشترکہ کوششیں، مکالمہ اور تعاون ناگزیر ہیں۔
